Panse espesyal pou popilasyon nan rejyon Sidwès la ann Ayiti
KOMITE POU AVANSMAN LANG KREYOL (KOMALAK) gen yon panse espesyal pou popilasyon nan rejyon Sidwès la ann Ayiti.
Nan dat 14 out ki pase a, peyi Dayiti viktim yon lòt gwo soukous, yon mwa apre bandi ame te ansasinen prezidan Jovenel Moise lakay li. Bonè nan matin 14 out la, latè te tranble avèk fòs nan rejyon Sidwès peyi a, e sa te lakòz plis ke 2 mil moun pèdi lavi yo, e anpil lòt te blese grav nan dega kay, lekòl ak legliz ki te kraze. Siklòn Grace pa t pran tan pou l te pote pwovizyon detrès pa li avèk anpil lapli, ak gwo van, sou sinistre sa yo ki te deja sanzabri.
Komite pou Avansman Lang Kreyòl (KOMALAK) pataje lapenn tout fanmi ki viktim yo, e tout manm komite a ofri kondoleyans yo bay tout fanmi ki pèdi moun yo nan katastròf natirèl sa a; nou panse ak tout blese yo, tout rès popilasyon nan zòn sinistre yo k ap tann èd ak sekou kondisyon yo reklame.
Nan mitan gwo dezas sa a ki frape rejyon Sidwès la, n ap lanse yon apèl pou mande popilasyon nan zòn afekte yo rete nan solidarite pandan efò sou pye pou founi yo èd ki nesesè. Nan sikonstans difisil sa a, n ap mande tou pou tout ayisyen toupatou pa bliye peyi natif-natal yo ansanm ak tout fanmi nan Sidwès peyi a ki konte sou nou.
Pou zòn Washington nan, KOMALAK ap envite nou kontribye nan efò pou pote sekou bay frè ak sè nou yo nan peyi Dayiti. Pou tout kontribisyon, nou kapab kontakte Christie Anne Short, nan òganizasyon Life Connexion Mission nan (301)518-4787 oubyen, Fred Williams nan òganizasyon KOMALAK nan (301) 680-0829.
